अमेरिकामा कार दुर्घटनामा दुई नेपाली विद्यार्थीको ज्यान गयो

अमेरिका , ३१ असार  । अमेरिकामा भएको कार दुर्घटनामा दुई जना नेपाली विद्यार्थीको मृत्यु भएको छ ।

लुइजियाना टेक विश्वविद्यालयमा अध्ययनरत २२ वर्षीय राजन यादव र २० वर्षीय रोजिन ओलीको कार दुर्घटनामा मृत्यु भएको हो । दुर्घटनामा अन्य दुई जना घाइते भएका छन् ।

दुवै जना नेपालका नागरिक रहेको भनिए पनि उनीहरूको नेपालको ठेगाना खुलेको छैन ।

लुइजियाना राज्य प्रहरीलाई उद्धृत गर्दै स्थानीय एक अनलाइनले लेखेको समाचारअनुसार १३ जुलाईको राति करिब ९ बजे भएको कार दुर्घटनामा उनीहरुको मृत्यु भएको हो ।

भारी वर्षाका कारण कार दुर्घटनामा परेको र उनीहरूको घटनास्थलमै मृत्यु भएको प्रहरीले जनाएको छ । घटनाबारे लुइजियाना राज्य प्रहरीले अनुसन्धान गरिरहेको छ ।

प्रहरीले घटनासम्बन्धमा अनुसन्धान भइरहेको जनाएको छ । – प्रशासन