स्वास्थ्य संस्थामा समेत दुईदिन बिदा लागु, आकस्मिक सेवा २४सै घण्टा

काठमाडौं ,४ बैशाख । दुईदिने सार्वजनिक बिदा स्वास्थ्य संस्थामा पनि लागु गरिने भएको छ ।

स्वास्थ्य मन्त्रालयले सरकारी स्वास्थ्य संस्थामा पनि हप्ताको दुईदिन (शनिबार र आइतबार) बिदा दिने निर्णय कार्यान्वयनमा ल्याएको जनाएको छ ।

मन्त्रालयका अनुसार, बिदाको समयमा पनि बिरामीको उपचारमा कुनै बाधा नपुग्ने गरी ओपीडी र आकस्मिक सेवा २४सै घण्टा सञ्चालनमा रहने व्यवस्था गरिएको छ ।

मन्त्रालयले अस्पतालहरूलाई बिरामीलाई सास्ती नपर्ने गरी सेवा व्यवस्थापन गर्न निर्देशन दिएको छ । आइतबारका लागि पूर्वनिर्धारित शल्यक्रिया बिरामीको सहजता हेरी पुनर्तालिकीकरण गरिने उल्लेख गरिएको छ ।

यस्तै, मन्त्रालयले एम्बुलेन्स सेवालाई पनि जुनसुकै समयमा तयारी अवस्थामा राख्न निर्देशन दिएको छ । बिदाको दिनमा उपलब्ध हुने सेवाबारे अस्पतालले आफ्नो वेबसाइट तथा सूचनापाटीमार्फत जानकारी सार्वजनिक गर्नुपर्ने व्यवस्था गरिएको छ ।