१६ पुसदेखि नियमित महाधिवेशन गर्नुपर्ने निष्कर्ष लिएर खड्का भेट्न पुगे गगन र विश्वप्रकाश

बुटवल , १४ कार्तिक । नेपाली कांग्रेसको संस्थापन इतर समूहको बैठकले पार्टीको नियमित महाधिवेशन आगामी पुसमा गर्नुपर्ने निष्कर्ष निकालेको छ ।

इतर समूहका नेता डा. शेखर कोइरालाको सम्पर्क कार्यलय विशालनगरमा उपसभापति धनराज गुरुङ, महामन्त्रीद्वय गगनकुमार थापा र विश्वप्रकाश शर्मा, सहमहामन्त्रीद्धय जीवन परियार र बद्री पाण्डेबीच भएको छलफलले मितिको प्रस्ताव गरेको हो ।

सो मितिको प्रस्ताव गर्दै अहिले थापा र शर्मा कार्यवाहक सभापति पूर्णबहादुर खड्कासँग छलफलमा छन् । महामन्त्री शर्माले बिहीबार कार्यवाहक सभापति खड्कालाई भेट्दा सोही मितिको प्रस्ताव राखेका थिए ।

‘पुसको १६ बाट नियमित महाधिवेशन गर्न तयारी गरियो भने आमचुनावलाई पनि धक्का पर्दैन र यदि चुनाव सरिहालेमा पनि सहज हुन्छ । चुनावमा जाँदा नयाँ नेतृतवमा जानुपर्छ भन्ने निष्कर्षमा हामी छौँ,’ बालुवाटार भेलामा सहभागी एक पदाधिकारीले भने ।