आज सभामुखको उम्मेदवारी दर्ता, रास्वपाबाट डोलप्रसाद अर्यालको दाबी

काठमाडौँ ,२० चैत । प्रतिनिधि सभाको सभामुख चयनका लागि शुक्रबार उम्मेदवारी दर्ता हुँदैछ । संघीय संसद् सचिवालयले सार्वजनिक गरेको कार्यतालिका अनुसार आज बिहान ११ बजेदेखि दिउँसो २ बजेसम्म मनोनयनको समय निर्धारण गरिएको छ ।

संसद् सचिवालयले शुक्रबार दिउँसो २:३० बजे उम्मेदवारको नामावली प्रकाशन गर्नेछ । प्रतिनिधि सभा नियमावली, २०७९ को नियम ७ बमोजिम सभामुखको निर्वाचन आगामी चैत २२ गते आइतबार बिहान ११ बजे बस्ने बैठकमा हुने गरी ज्येष्ठ सदस्यले मिति तोकेका छन्।

यसपटकको निर्वाचनमा राष्ट्रिय स्वतन्त्र पार्टी (रास्वपा) ले उपसभापति डोलप्रसाद अर्याललाई उम्मेदवार बनाउने निर्णय गरिसकेको छ । बिहीबार बसेको रास्वपा संसदीय दलको बैठकले अर्याललाई सभामुखको उम्मेदवार बनाउने प्रस्ताव सर्वसम्मतिले पारित गरेको हो ।

वर्तमान प्रतिनिधि सभामा रास्वपाको झण्डै दुई तिहाइ १८२ सांसद सिट रहेकाले अर्याल सभामुखमा निर्वाचित हुने निश्चित देखिएको छ । काठमाडौँ क्षेत्र नं. ९ बाट निर्वाचित अर्याल यसअघि पार्टीको कार्यवाहक सभापतिको जिम्मेवारीमा समेत रहेका थिए ।

सचिवालयका अनुसार यदि एकभन्दा बढी उम्मेदवारी परेमा चैत २२ गतेको बैठकमा निर्वाचन प्रक्रिया अघि बढ्नेछ । यद्यपि, वर्तमान सत्ता समीकरण र अंकगणितका कारण अर्याल निर्विरोध हुने सम्भावना बलियो छ ।