सुरेन्द्र पाण्डे भन्छन् : एमालेको लाइन ‘जबज’ हो, ‘माओवादी जनयुद्ध’को भाष्य नबोलौँ

काठमाडौं,२६ चैत ।  नेपाल कम्युनिस्ट पार्टी (एमाले) का नेता सुरेन्द्र पाण्डेले राजनीतिमा वैचारिक स्पष्टता सबैभन्दा ठूलो शक्ति भएको बताएका छन्।

सामाजिक सञ्जाल फेसबुकमार्फत् धारणा सार्वजनिक गर्दै उनले एमालेको आफ्नै गौरवशाली इतिहास, संघर्ष र मौलिक सिद्धान्त रहेको उल्लेख गरेका छन्।

उनले ‘माओवादी जनयुद्ध’को भाष्य एमालेको आधिकारिक धारणा नभएको स्पष्ट पार्दै पार्टीको मूल मार्ग ‘जनताको बहुदलीय जनवाद’ (जबज) नै रहेको बताएका छन्।

जबजले शान्तिपूर्ण प्रतिस्पर्धा, संवैधानिक सर्वोच्चता र जनताको मतलाई परिवर्तनको आधार मान्ने पनि उनले बताएका छन् ।

नेता पाण्डेले पार्टीभित्र विभिन्न पृष्ठभूमिबाट आएका नेताहरूका आ-आफ्नै बुझाइ हुन सक्ने भए पनि एमालेको झण्डामुनि एकीकृत भएपछि पार्टीको आधिकारिक दस्तावेजअनुसार बोल्नुपर्ने बताएका छन्।

सार्वजनिक मञ्च वा संसद्मा व्यक्त व्यक्तिगत धारणा ‘पार्टी लाइन’का रूपमा प्रस्तुत गर्दा कार्यकर्तामा भ्रम र जनतामा अविश्वास पैदा हुने उनको भनाइ छ।

उनले अतिवादी र उग्र दृष्टिकोणले पार्टीलाई अगाडि बढाउनुको सट्टा पछाडि धकेल्ने चेतावनी दिँदै वर्तमान आवश्यकता विगतका द्वन्द्वकालीन अभ्यासको प्रशंसा गर्नु नभई शान्तिपूर्ण लोकतान्त्रिक प्रक्रियाबाट आर्थिक रूपान्तरणमा केन्द्रित हुनु रहेको बताए।

पाण्डेले एमालेलाई मौलिक र सुदृढ रूपमा अगाडि बढाउन वैचारिक धरातल नबिर्सन आग्रह गरेका छन्।