बैंकमा पनि दुई दिन बिदा लागू, ९ बजेदेखि ४ बजेसम्म खुल्ने

बुटवल ,२३ चैत । सार्वजनिक कार्यालय, स्कुल कलेजसँगै बैंकिङ क्षेत्रमा पनि सातामा दुई दिन बिदा लागू हुने भएको छ । पेट्रोलियम पदार्थको खपत कम गर्ने उद्देश्यले सरकारले आइतबार दुई दिन सार्वजनिक बिदा दिने निर्णय गरेको थियो । सातामा शनिबार र आइतबार दुई दिन छुट्टी दिने मन्त्रिपरिषद्ले निर्णय गरेको छ ।

योसँगै सोमबारदेखि नै सरकारी कार्यालय बिहान ९ बजे खुलेका छन् । सातामा ५ दिन मात्र काम हुने भएपछि सरकारले साविकको समयमा १ घण्टा बढाउँदै काम गर्ने समय बिहान ९ देखि बेलुका ५ बजेसम्म बनाएको छ ।

यता बैंक तथा वित्तीय संस्थाहरू पनि अब सोमबारदेखि शुक्रबारसम्म सातामा ५ दिन खुल्ने भएका छन् । सरकारले तोकेको समय अनुसार काम गर्ने समय एक घण्टा समय थप गरिएकोमा सोमबारदेखि बैंक तथा वित्तीय संस्थाहरू बिहान ९ बजेदेखि बेलुका ४ बजेसम्म खुल्ने भएका छन् ।

यसअघि बैंक तथा वित्तीय संस्था बिहान १० बजेदेखि बेलुका ३ बजेसम्म खुल्ला रहन्थे । नेपाल राष्ट्र बैंकले २२ चैतबाटै सातामा सोमबार–शुक्रबारसम्म बिहान ९ बजेदेखि बेलुका ४ बजेसम्म बैंक खुला गरी बैंकिङ सेवा प्रवाह गर्न भनेको छ । सोही व्यवस्था अनुसार सोमबारदेखि बैंक तथा वित्तीय संस्थाहरूले बिहान ९ बजेदेखि सेवा प्रवाह गर्न थालेका हुन् ।