अब डाक्टर इन्जिनियर समावेशी कोटामा पढ्न नपाइने

काठमाडौं,९ जेठ । समावेशी तथा आरक्षित कोटामा डाक्टर इन्जिनियर लगायत विशिष्टीकृत अध्ययन गर्ने व्यवस्था सरकारले हटाउने भएको छ ।

सरकारले आर्थिक सुधार कार्यान्वयन योजना, २०८२ स्वीकृत गर्दै विशिष्टीकृत सेवामा कोटा प्रणाली खारेज गर्ने कार्ययोजना अगाडि सारेको हो ।

‘विशिष्टीकृत सेवाहरू जस्तै डाक्टर, पाइलट, इन्जिनियर आदिमा कोटा प्रणालीले गर्दा उत्पादन ऋणात्मक बनेको हुँदा कोटा प्रणाली खारेज गर्ने’, सरकारको कार्ययोजनामा भनिएको छ ।

सो कार्ययोजना एक वर्षभित्र लागू भइसक्ने सरकारले जनाएको छ । सरकारले अगाडि सारेको कार्ययोजना कार्यान्वयन हुँदा विशिष्टीकृत शिक्षामा अब सबैले स्वतन्त्र प्रतिस्पर्धा गरेर मात्रै अध्ययन गर्न पाउने अवस्था सिर्जना हुने देखिएको छ ।