लुम्बिनी प्रदेशसभाको बजेट अधिवेशन आजदेखि सुरु हुँदै

बुटवल , ३१ बैशाख । लुम्बिनी प्रदेशसभाको छैटौँ तथा बजेट अधिवेशन आजदेखि सुरु हुँदैछ । बैठक दिउँसो १ बजेका लागि बोलाइएको प्रदेशसभा सचिवालयले जनाएको छ । लुम्बिनी प्रदेश सरकारले प्रदेशसभाको बजेट अधिवेशन वैशाख ३१ गते बोलाउन प्रदेश प्रमुखसमक्ष सिफारिस गरेको थियो ।

अधिवेशन प्रारम्भको अवसरमा आजको बैठकमा विभिन्न दलका तर्फबाट सांसदहरुले शुभकामना मन्तव्य राख्ने कार्यसूची रहेको छ । प्रदेश सरकारले आगामी जेठ ४ गते नीति तथा कार्यक्रम ल्याउने तयारी गरेको छ । लुम्बिनी प्रदेशसभाको पाँचौँ अधिवेशन गत फागुन ७ गते अन्त्य भएको थियो ।