अर्जेन्टिना-स्पेनबीचको फाइनलअघि थाहा पाउनु पर्ने १० तथ्यांक

एजेन्सी । फिफा विश्वकप २०२६ को फाइनलमा शनिबार राति अमेरिकाको न्यु जर्सीको मेट लाइफ रंगशालामा स्पेन र अर्जेन्टिना भिड्दै छन्।

अर्जेन्टाइन कप्तान लिओनल मेसी र स्पेनिस युवा स्टार लामिन यामल चर्चामा रहने यो भिडन्तका केही रोचक र ऐतिहासिक तथ्यांक यहाँ प्रस्तुत गरिएको छ।

१. पासको बादशाह – रोड्रि (६४८ पास)
स्पेनका मिडफिल्डर रोड्रिले यस विश्वकपमा ६४८ वटा सफल पास दिएका छन्, जुन विश्वकप इतिहासकै सबैभन्दा धेरै हो। उनले आफ्नै कतार विश्वकपको रेकर्ड (६३८ पास) तोडेका हुन्। उनलाई पछ्याउँदै स्पेनकै पाउ कुबार्सी (५४७) र लापोर्टे (५३३) क्रमशः दोस्रो र तेस्रो स्थानमा छन्।

२. स्पेनको अपराजित यात्रा (३७ खेल)
स्पेन विगत ३७ खेलदेखि हारेको छैन। सन् २०२४ मार्चमा कोलम्बियासँग हारेयता स्पेनले २७ खेल जितेको छ भने १० खेल बराबरी खेलेको छ। यो पुरुष फुटबल इतिहासकै सबैभन्दा लामो अपराजित यात्राको कीर्तिमान हो।

३. ड्रिबलमा लामिन यामलको जादु (३० ड्रिबल)
स्पेनका १७ वर्षीय विङ्गर लामिन यामलले यस प्रतियोगितामा सबैभन्दा धेरै ३० पटक विपक्षी खेलाडीलाई छक्याउँदै (ड्रिबल) अगाडि बढेका छन्। उनले एमबाप्पे (२४) र मेसी (२२) लाई पनि पछि पारेका छन्।

४. अर्जेन्टिनाको गोल वर्षा (१९ गोल)
अर्जेन्टिनाले यस विश्वकपमा १९ गोल गरिसकेको छ (प्रति खेल औसत २.७१ गोल)। सन् १९७० को ब्राजिलियन टोली पछि एउटै विश्वकपमा यति धेरै गोल गर्ने अर्जेन्टिना पहिलो टिम बनेको छ। यता स्पेनले १३ गोल गरेको छ, जुन उसको विश्वकप इतिहासकै उत्कृष्ट प्रदर्शन हो।

५. लगातार गोलको रेकर्ड (१३ खेल)
अर्जेन्टिनाले विश्वकपका पछिल्ला १३ खेलहरूमा लगातार कम्तीमा २ गोल गरेको छ, जुन एउटा नयाँ रेकर्ड हो। सन् २०२२ को कतार विश्वकपमा साउदी अरेबियासँग हारेयता अर्जेन्टिनाले हरेक खेलमा २ वा सोभन्दा बढी गोल गर्दै आएको छ।

६. मेसीको गोल्डेन बुट र असिस्ट (८ गोल, ४ असिस्ट)
लियोनेल मेसीले यस प्रतियोगितामा ८ गोल गरिसकेका छन्। उनी गोल्डेन बुटको दौडमा सबैभन्दा अगाडि छन्। मेसीले ४ वटा असिस्ट (गोल गर्न पास) पनि दिएका छन्। ५६ वर्षअघि गर्ड मुलरले राखेको १३ गोलको योगदान (गोल + असिस्ट) को रेकर्ड तोड्न मेसी अब मात्र एक कदम टाढा छन्।

७. शतप्रतिशत जितको कीर्तिमान
अर्जेन्टिनाले यस विश्वकपका सबै ७ खेल जितेको छ। यदि फाइनल जितेमा अर्जेन्टिना इतिहासको पाँचौँ यस्तो टोली बन्नेछ, जसले विश्वकपका सबै खेल जितेर ट्रफी उचालेको छ।

Ncell
८. उनाई सिमोनको ‘वाल’ (६ क्लिन सिट)
स्पेनका गोलकिपर उनाई सिमोनले ७ मध्ये ६ खेलमा कुनै गोल खाएका छैनन् (क्लिन सिट)। यो विश्वकप इतिहासमै एउटा रेकर्ड हो। उनले ६५० मिनेटसम्म गोल नखाई इटालीका वाल्टर जेङ्गाको ५१७ मिनेटको पुरानो रेकर्ड पनि तोडिदिएका छन्।

९. पेनाल्टी बक्स बाहिरबाट गोल
अर्जेन्टिनाले पेनाल्टी बक्स बाहिरबाट ५ गोल गरेको छ, जुन विश्वकपको रेकर्डसँग बराबर हो। यसमध्ये मेसीले २ गोल गरेका छन्। योसँगै मेसी विश्वकप इतिहासमा बक्स बाहिरबाट सबैभन्दा धेरै गोल गर्ने खेलाडी बनेका छन्।

१०. ओयार्जाबालको सफलता
स्पेनका मिकेल ओयार्जाबालले यस विश्वकपमा ५ गोल गरेका छन्। उनले स्पेनका लागि एउटै विश्वकपमा धेरै गोल गर्ने डेभिड भिल्ला र एमिलियो बुट्रागुएनोको रेकर्ड बराबरी गरेका छन्।

तथ्यांक हेर्दा स्पेनको डिफेन्स र पासिङ निकै मजबुत देखिन्छ भने अर्जेन्टिनाको आक्रमण र मेसीको लय डरलाग्दो छ। यो फाइनल फुटबल इतिहासकै अविस्मरणीय खेल हुने निश्चित छ।