गुल्मीको सत्यवतीमा स्थानीय गाईपालकलाई १० हजारको अनुदान, पहिलो ब्याउने गाईलाई प्रोत्साहन

गुल्मी, ०८ साउन । सत्यवती गाउँपालिकाले गाउँघरमा गाईपालनको परम्परा जोगाउन र रैथाने गाईको संरक्षण गर्न विशेष अभियान थालेको छ । पहिलोपटक ब्याउने गाईका लागि पालिकाले प्रति गाई रु. १० हजार अनुदान दिने निर्णय गरेको छ ।

गाउँपालिकाका अध्यक्ष टीकाराम पाण्डेका अनुसार अनुदान कार्यक्रम स्थानीय गाईको बाच्छी हुर्काउने कामलाई प्रोत्साहन गर्न ल्याइएको हो । यो कार्यक्रम चालू आर्थिक वर्ष २०८२/८३ को स्वीकृत वार्षिक पशुपन्छी विकास योजनाअन्तर्गत ल्याइएको हो ।

अनुदान पाउनका लागि गाईले २०८२ साउन १ देखि २०८३ असार १५ भित्र पहिलो पटक बेत ब्याएको हुनुपर्छ । किसानले पालिकामा निवेदन दिँदा नागरिकता, छिमेकीको हस्ताक्षर भएको मुचुल्का, सम्बन्धित वडाको सिफारिस, माउ र बाच्छा देखिने तस्बिर, चेकको प्रतिलिपि र भेटेरिनरीको स्थलगत रिपोर्ट बुझाउनुपर्नेछ ।

उपाध्यक्ष निरमाया तरामुका अनुसार अनुदान आफ्नै गोठमा हुर्काएको गाईको बाच्छीलाई मात्र दिइनेछ, अन्यत्रबाट किनेर ल्याएको गाईका लागि लागू नहुनेछ ।

गाउँघरमा गाईपालन घट्दै गएको बेला स्थानीय गाईको संरक्षण र कृषकलाई प्रोत्साहन गर्ने यो योजना ग्रामीण कृषि प्रणाली जोगाउन महत्त्वपूर्ण कदम भएको स्थानीयले बताएका छन् । रासस