धुर्कोटमा सम्पन्न पाँचौं अध्यक्ष कप: दुबै उपाधिमा वडा नं. ३ हाडहाडे बिजय

बासुदेव पोखरेल, गुल्मी/११ जेठ गुल्मीको धुर्कोट गाउँपालिकाको आयोजनामा सम्पन्न पाँचौं अध्यक्ष कप अन्तर वडा स्तरीय पुरुष तथा महिला भलिबल प्रतियोगितामा वडा नं. ३ हाडहाडेले दुवै उपाधि जित्दै दोहोरो सफलता हात पारेको छ ।

शनिबार धुर्कोट–४ जैसिथोकस्थित कालापोखरा खेल मैदानमा सम्पन्न प्रतियोगितामा गाउँपालिकाका सातवटै वडाबाट टिमहरूको सहभागिता रहेको थियो। पुरुषतर्फ वडा नं. ३ हाडहाडे प्रथम, वडा नं. २ पिपलधारा दोस्रो र वडा नं. ६ रजस्थल तेस्रो स्थानमा रहन सफल भए। यस्तै, महिलातर्फ पनि वडा नं. ३ हाडहाडे प्रथम, वडा नं. ७ वाग्ला दोस्रो र वडा नं. ६ रजस्थल तेस्रो भए ।

समापन समारोहमा बोल्दै गाउँपालिका अध्यक्ष भूपाल पोखरेलले खेलकुदले युवा पुस्तालाई अनुशासित, सक्रिय र जिम्मेवार बनाउन सघाउने बताउँदै यस्ता कार्यक्रमले वडाहरूबीचको आपसी सम्बन्ध बलियो बनाउने धारणा राख्नु भयो । “खेलकुद एकता र समृद्धिको आधार हो, यसलाई अझ सुदृढ बनाउँदै लैजान हामी प्रतिबद्ध छौं,” अध्यक्ष पोखरेलले भन्नु भयो ।

कार्यक्रममा उपाध्यक्ष सीता गिरी, प्रमुख प्रशासकीय अधिकृत ज्ञानुराम पन्थी, वडाध्यक्षहरू, राजनीतिक दलका प्रतिनिधि, शिक्षक, कर्मचारी, विद्यार्थी र स्थानीय खेलप्रेमीहरूको उल्लेखनीय उपस्थिति रहेको थियो ।

कार्यक्रमको सञ्चालन शिक्षा शाखा प्रमुख दामोदर घिमिरेले गर्नुभएको थियो ।